كاس وداير

ينظر الي رمز كليته المرسوم علي احدي كتبه. بعد مرور خمس سنوات ع التحاقه بها.... انها المره الاولي التي يتأمله فيها . يالهي أنه ثعبان يلتف حول كأس لينفث فيه سمومه  باختصار كأس يمأله السم ....يتذكر مقوله باولو كويلو "God speaks to us through signs"
"يتحدث الينا الله عن طريق الاشارات" يندم ع تأخر استعيابه لاشاره الله له قبل دخولها....وتلتقظ اذناه في تلك اللحظه صوت المنشاوي في اذاعه القران الكريم"فأغشيناهم فهم لا يبصرون"

حروتوف

1_مفارقات:_ينشر اليوم السابع في مقدمه موقعه الاخباري اعلانا لكشري ابو طارق......بصراحه اول مره اشوف محل كشري يعمل اعلان لمحل كشري زيه

2_ قصه:_دخل لص مسلح أحد البنوك ويقوم بالسطو وسلب الفلوسوقبل مغادرته يلتفت إلى أحد الزبائن ويسأله : هل رأيتني أسرق البنك ؟؟فيجيبه الرجل : نعم يا سيدي لقد رأيتكفيطلق اللص النار عليه و يرديه قتيلاًثم يلتفت إلى رجل وزوجته ويسأل الزوج: هل رأيتاني أسرق هذا البنك ؟؟فيجيبه الزوج : لا يا سيدي أنا لم أراك ولكن زوجتي رأتك

3_ دروس مستفاده من القصه اللي فوق:_الحياه فرص.......فاغتنمها

4_مقارنه:_ إيران تعلن عن بدء تشغيل مفاعل بوشهر رسميًّا.............مصر تعلن رسميا انا مسلميها زادو اتنين ومسيحيها نقصو اتنين

5_مداخله:_  في اطار محاولات الغرب الحثيثه في تشويه صوره كل ما هو اسلامي متمثلا هذه المره في بن لادن_ ع الرغم من اختلافي معه_ نشرت بعض الصحف عن عثورهم ع "فياجرا أعشاب" في غرفه نومه الشخصيه(منتهي الانتهاك لخصوصيه الانسان من ادعياء حقوق الانسان) ونشرت مجله اخري انه كان مدمنا للكوكالا والبيبسي ع الرغم من كونهم منتجات امريكيه لعينه(ع فكره اول مره اشوف واحد بيشرب الاتنين مع بعض) احب اقلهم كمان انه كان بيلعبPS(بلاي استاشن يعني) وكان بيشجع مانشستر وكنت مسلفه خماشر جنيه حتي بالاماره هتلاقوهم في جيب البنطلون اللي اتقتل فيه... بقدم التماس للقوات الامريكيه ترجعهملي.......وانا سايب عنواني في الكنترول

6_خيال واسع:_تخيل لو ستنا حوا وسيدنا ادم اتتخانقو وقالتلو لو انت اخر واحد ع الارض برده مش هتجوزك؟؟؟؟!!!!!

7_هي دي مصر يا عبله:_ افرز لنا شغب  جماهير الزمالك "الراجل ابو جلابيه" والذي تلقي احد العروض ليصبح نجما سينمائيا.....وافرز لنا شغب جماهير الاهلي "أما بديعه" والتي اتوقع ان تغير مروه اغنيتها "أما نعيمه" لتصبح "أما بديعه"

8_روايات مصريه للجيب: في ظل ازمه"عبير" و " غاده الكاميليا" يحاول السلفيين تقمص دور "رجل المستحيل" اما مصر فهي تعيش بسبب تلك الروايه السابقه عدد خاص جدا من"ملف المستقبل"

هنادي كلها الغبا مش الوبا

انصحك صديقي القاريء بوضع حبايه من شريط الضغط في فمك كأجراء احترازي وذلك اذا كنت من مرضي الضغط اما اذا كنت سليما فانصحك ايضا بوضعها بجوارك لانك ستحتاجها في نهايه هذا المقال

كنت بصدد عمل بحث في كومنتات المواقع الاخباريه ع الاخبار المتنوعه في محاولات حثيثه لتحليل شخصيه قارئي الصحف من المصريين والذين من المفترض ان يمتلكو قدرا لا بأس به من الثقافه وهذه بدايه العينه واول استفتاح لينا
هذه مجموعه من الكومنتات ع مقال منشور في جريده اليوم السابع بعنوان غنيم يعلن تضامنه مع اضراب الاطباء

1_الي الاطباء

بواسطة: محمد
بتاريخ: الثلاثاء، 10 مايو 2011 - 11:00
اي اجور عاوزين تزودوها يا اللي معنكمش دم ده الواحد فيك اول ميتححرج بيشتغل و يقبض 500 وبعدها بكام شهر 800 و بعد سنيت شغل يوصل المرتب الي 1500 جنيه في الشهر غيركم بيقبض 170 جنيه في الشهر بعد ميطلع عين اهله تدوير علي شغل قال عاوزين يرفعو مرتباتهم ده المفروض يخفضو مرتباتكم للمساوة بين العاكملين بالدولة وانا احذركم و احذر الحكومة من رفع مرتباتهم في هذه الحالة انتظرو اضرابا للمدرسين يشل العملية التعليمة و الامتحانات ناس معندهاش دم

 .اظن باين في الكومنت كميه الحقد والغل والسواد(جاتكو نيله مليتو البلد) ع فكره لسه هيبان حاجات تانيه كتير من كومنتات الناس عليه يعني مثلا هيبان.......متيجي نشوف


2_يا ترى

بواسطة: راشد
بتاريخ: الثلاثاء، 10 مايو 2011 - 11:00
يا ترى يا دكتور لو لا قدر الله فاجأتك أزمة قلبية ستقول لا تسعفونى اليوم لأنكم فى أضراب مستحق؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

.خلي بالكو مكتوب في المقال ان الاضراب لا يشمل اقسام الطواريء ولا الاقسام الداخليه بس الظاهر البرنس لسه( مصطبح)* وقتي وجاي يطلع السيجارتين علينا

3_الى المدرسين !!

بواسطة: عمرو
بتاريخ: الثلاثاء، 10 مايو 2011 - 11:31
هوه سيادتك قعدت تدرس كام سنه عشان تبقى مدرس !
باش السؤال ده ، سؤال تانى انت عندك كام سنه ؟؟؟ عشان اقولك طبيب اكبر منك بخمس سنين مثلا بياخد كام
بلاش برده السؤال ده ، انت بتشتغل كام ساعه فى اليوم و عندك نبطشيات ؟؟
ولا برده بلاش السؤال ده كمان ، بس انا كده مش هخلص من الأسئله !!!!!!!!!!!
لا حول ولا قوة الا بالله................ردا ع رقم واحد
انا عارف ان حد هيجي يقلي هي المقاله دي مش عن اضراب الاطباء ايه دخل المدرسين  انت مصطبح انت كمان ولا ايه؟ هرد اقوله ياريت مراح وراحت لياليه....... اصدي ولا بشربه يا باشا..... ده هو والنعمه الشريفه الغبي رقم 1 برده هو اللي داخل يقول" اشمعن" طب يلا بقا جاوب ع الاسئله دي يعم الاور

3_اضراب

بواسطة: طبيبه
بتاريخ: الثلاثاء، 10 مايو 2011 - 11:49
انا دكتوره بقالى خمس سنين متعينه ومرتبى بعد الزياده فى شهر 4 بقى 344 جنيه

وده برده رد ع التعليق الاول وهذا يدفعني الي سؤاله ما مصدر تلك المعلومات او ادعني انعتها بالغازات الكريهه التي اطلقتها في وجوهنا؟.......استنتاج منطقي :_ اكيد ضارب كميه محترمه من الكرنب او الفرنبيط.... وانصحه باي مضاد انتفاخ او حبوب الفحم

5_قف للمعلم وفه التبجيلا كاد المعلم ان يكون رسولا

بواسطة: مدرس من 96 وراتبي مش محصل 300 جنيه
بتاريخ: الثلاثاء، 10 مايو 2011 - 11:51
الاخ رقم 4 اللي باين عليه انه دكتور انا ارد عليك من سؤالك الاول انت تسأل قعدت كام سنه تدرس ؟ مين بقى اللي درس لك طبيب والا مدرس ؟

وده تقريبا صاحب التعليق رقم واحد بيدو مع بعض في نفس المدرسه (ولو ان بالمستوي ده معتقدش انه بيدو في كتاب حتي) واحتمال اخر ان داخل يزيط برده مهي هاصت بقا وبيتكلم عن المدرسين (تابعونا في واحده هتشرشحله قدام.......انظر الجامع في اثبات زيف الكومنتات)

سماسره مش اطباء

بواسطة: Yasser
بتاريخ: الثلاثاء، 10 مايو 2011 - 12:11
انا بشتغل فى الأدويه من 10 سنين الاطباء اللى عاملين اضراب بياخدوا عموله من الشركات عشان يكتبوا الدوا حتى لو المريض مش محتاج . و نسبه من المعامل حتى لو المريض مش محتاج . و نسبه من الاشعه و نسبه من الصيدليه و اللى يدفع اكتر احنا وراه . أسوأ أخلاق و نسوا قسم المهنه . ده ناقص ياخدوا نسبه من السايس اللى بيركن عربيات المرضى . حسبى الله و نعم الوكيل . انشر من فضلك عشان الناس تعرف بيتنصب عليها ازاى

وده كلامه الي حد كبير صحيح لكن هو مسالش نفسه مين اللي وصلهم لكده؟؟؟؟؟؟

كلكم على حق

بواسطة: د.ماجد
بتاريخ: الثلاثاء، 10 مايو 2011 - 12:41
الى السادة الافاضل الاساتذة و الاطباء كل منكم على حق فى مطالبة فالمدرس يحتاج لزيادة راتبة ايضا" و لكن لابد ان تكون هنالك بداية و انا ارى ان الاطباء هم الاحق بذلك لان رفع دخل الطبيب سوف يعود على المواطنين و الخدمة الطبية ككل بالنفع
وعلى فكرة و اللة انا اعرف اطباء مش قادرين يصرفوا على بيوتهم و اولادهم (يعنى بيشحتوا) ومنهم من اصيب بفيرس سى و بى و لايجد ثمن العلاج و الدواء و الاعتقاد بان كل الاطباء ميسورى الحال و اللة خاطىء لان هؤلاء قلة لا تتجاوز 5 فى المائة

وده راجل سو كيوت وحد لذوذ وحبوب لانه مبيحبش يزعل اي حد من الطرفين وماشي باسلوب" العبو مع بعض يا ولاد متتخانقوش ويلا يا حبيبي منك له بوسو راس بعض"......افضل شخصيا اسلوب" العبو بعيد يا ولاد...... بدل مرش ميه وسخه(لامؤاخذه في اللفظ بس هي بتتقال كده)"

تعليقات غير مسئولة اللي ما يعرفش يقول عدس

بواسطة: Farid
بتاريخ: الثلاثاء، 10 مايو 2011 - 12:45
اقسم بالله العلي العظيم اني طبيب من 26 سنة ومرتبي 680 جنيه وبدون اي جزاءات وبتقدير ممتاز وتخطيت ال50 سنة وعندي اولاد في الجامعات حسبنا الله ونعم الوكيل

وده برده للتعليق رقم واحد واحبه فعلا أكد انه( مبيعرفش)

الي المعلقين جميعا

بواسطة: د.ايمان
بتاريخ: الثلاثاء، 10 مايو 2011 - 12:49
انا طبيبة ودرست 6سنوات جامعية منهم سنة ب16شهر وسنة ب12 شهر يعني مش زي سنوات الدراسة كلها وكله باختياري مش اجباري .بس بعد كدا اخدت امتياز ورفضت المستشفيات الخاصة تعيينا الا بعد انتهاء الامتياز.مرتبي بقي كام بعد التعيين بالبدلات مرتبي 320جنيه والحوافز بنقبضها كل ثلاث شهور او اربعة بيصرفوا شهر حوافز وهذه مهزلة تحدث في كل الرعايات الحكومية.بدل العدوي 15جنيه في الوقت اللي تمن نصف كورس مضاد حيوي اكتر من كدا .ناهيك عن حقنة الانترفيرون لو لا قدر الله اتنقل فيروس سي وهذا كثيرا مايحدث الف جنيه.والعدد يبلغ 85حقنه تقريبا.خوافض اللسان اللي بنكشف بيها علي الاطفال بنشتريها من فلوسنا.اجهزة الضغط والسماعات بنجيبها احنا تبرع من هذا المرتب.جهاز السونار بيعطل احنا اللي بنصلحه من معانا عشان نشتغل .قبل كدا معملناش اضراب ثصحيح بس بعتنا اكتر من شكوي بل مئات الشكاوي الي الوزارة لم تستجب.علي فكرة القفازات الطبية بنشتريها كمان علي حسابنا لان الحكومة بتصرف لنا علبة واحده في الشهر واحنا بنستهلك اكتر من اربعة .تفتكر نكشف من غير جوانتي عشان نتعدي او المريض اصلا هيوافق .ولا مانكشفش خاتلص احسن ولا نجيب علي حسابنا مع هذا المرتب.اما الاستاذ اللي بيقول مرتبي 300جنيه من 96 فاظن دا مرتبك من غير البدلات والحوافز اي الاساسي يعني دا غير مكافاة الامتحان كل سنة دا غير الدروس الخصوصية.واظن حضرتك ما بتاخدتش نبطشيات وما بتسهرش وما بتشتغلش 7ايام في الاسبوع دا غير انك بتاخد اجازة 4شهور في العام مدفوعة المرتب والحوافز والبدلات.ياريت بقي يبقي فيه عدل شوية وذوق في الكلام ومراعاة حقوق الاخرين وبلاش مغالطات.والاضراب لن ينال من الحالات الحرجة والطواريء لان بردوا لازلنا بشر

 تسميه صاحبه هذا التعليق ب "الي كل الكومنتات" واسميه انا "الجامع في اثبات زيف الكومنات" فنجدها تستفز الغدد الدمعيه عندي للبكاء والشحتفه ع احوال هؤلاء المساكين الذين صدرت فتوي في عصر مبارك بمشروعيه اخراج الزكاه والصدقه عليهم(اي والله حصل) وتجدها "تفيش"* الصايع بتاع 300 جنيه وتكشف كذبه وتعرض علينا في كلامات قليله صوره من مأساه الاطباء

ده يا جماعه جزء صغير من الصوره الصوره اللي اصبح فيها من يسقي العلم لتلك الأمه جاهلا ومن يعالجها مريضا وليس باقي اعمده هذا المجتمع بمنأي عن هذا الخلل ولكني ازاء كل هذا لا املك الا الامل في المستقبل والحلم بمصر النهضه.....فلو بطلنا نحلم نموت

ملحوظات: يصطبح*:_ يدخن سيجاره الصباح المحشوه بالحشيش غالبا واحيانا البانجو

يفيش*:_فيشت ايمان محمد اي كشفت كذبه وجهله واحباطها لمحاولاته للصياعه علينا

ميني تخاريف

1_ اهداء: بعد خطاب مبارك الاخير للشعب بتاع "فتشني فتش".......الشعب يهدي للرئيس  اغنيه"اديك تقول مخدتش.... يا ناكر الجميل"

2_ الرئيس القادم: بعد التصريحات الحنجوريه لبكري بأننا (اللي هو الشعب يعني) نريد رئيسا (صيف في ترعه) فاعتقد كده ان الرئاسه متفصله علي اتنين في مصر لا تالت لهما الراجل ابو جلابيه بتاع ماتش الزمالك..........ومصطفي بكري شخصيا

3_التحرير وبلاويه واللي بيجري فيه: اثر ازمه الكتابه التي اعيشها مؤخرا بعد الثوره(راحو اللي كانو بيمسحو بايدهم دموعنا وجيوبنا.....كان الواحد مش عارف ايامها يتريق ع مين ولا مين) اضم صوتي لاصوات الدهماء (العامه يعني.....مثقف بقا يا سيدي تقول ايه؟؟)من الشعب بجميع فئاته بلطجيه ومرتشين وبصمجيه واعلن استيائي الشديد وشجبي وتنديدي بثوره 25 يناير والشباب بتوع الميدان واحب اقولهم......منكو لله خربتو البلد يا قطاعين الارزاق

4_بركاتك يا هيفا :_ انتشر ع الفيس بوك في الاونه الاخيره صور كتير لناس بتبوس ايد ناس ايشي توفبق عكاشه(الفائز الاول برصيد 3 بوسات لشخص واحد) وايشي يوسف بطرس غالي(بوسه ع ايد ماما سوزان....بر الوالدين بقا وكده) ومؤخرا الفقي و وهنا يأتي اعجاز هيفا في اطارقراءه واعيه للواقع المحيط  واستقراء المستقبل وتلخيص كل هذا في مضمون فني عميق يحتوي بهريز الحكمه فهاهي تنبئنا بسياسه النظام القديم مع مريديه والتي تتلخص في الكوبليه (بوس الواوا ليك الواوا خلي الواوا يصح) وتعود لتنبئنا بحال هؤلاء المريدين بعد الثوره (انا من دونك انا بردانه اح) بجد( احنا اسفين) يا هيفا ....فهمناكي غلط

5_عمرو موسي يأم المصلين بالاقصر.......لا تعليق


تصحيح مسار


يعيش المثقف علي مقهي ريش





يعيش يعيش يعيش





محفلط مزفلط


كتير الكلام


عديم الممارسه





عدو الزحام





بكام كلمه فاضيه





وكام اصطلاح





يفبرك حلول المشاكل قوام





يعيش المثقف





يعيش يعيش يعيش





يعيش اهل بلدي








كلمات الفاجومي العبقري:احمد فؤاد نجم





"وذكر ان الذكري تنفع المؤمنين"

black list



اكتشف ان ظاهره ان يكون لك اعداء ظاهره صحيه جدا فالارواح كأقطاب المغناطيس ما تجاذب منها أئتلف وما تنافر منها اختلف
اكتشفت ان استحاله تقرب قطبين متنافرين مهما حاولت بكل الوسائل والطرق

اكتشفت ان فكره ان يكون لك"عدو" تجعل للحياه معني ما مفعم بالتحدي واتقاء السقوط خشيه الشماته فيك والرغبه في اثبات انك احسن منه

اكتشفت ان طول الوقت ناس معينه مفكراني"خنيق" وانا بحاول اثبت العكس وكل ده من طاقتي وذلك سعيا وراء الصوره المثاليه الكامله اللي مش موجوده اصلا غير في خيالي لذلك احب اقول للناس دي بدل انا "خنيق" بقا يبقي ضربو الاعور علي عينه قال خربانه خربانه
وكده انت مخلتوش ليا حاجه اخسرها بالنسبالكم لذا ف "تيييييييييييييييييييييييت" دي شتيمه ليهم ميصحش اقولها هنا

اكتشفت ان الطاقه دي ممكن تستخدمها مع ناس فعلا يستحقو تقرب منهم بجد(قانون الوفره......يمكن اختصاره بجمله المحلق "منير" قلب الحياه مليان حاجات وبتفرح)

اكتشفت ان الحب بذره رباني ربك بيرميها في القلوب مش محتاجه مجهود منك تبذله بس محتاجه بس رعايه عشان البذره دي تكبر


وبناء علي ما سبق قررت اعمل بلاك ليست والحمد لله "عدوي" الاول دخلها من اوسع ابوابها مبروك عليه





والله زمان يا سلاحي...............والله زمان يا لساني ........ويا اهلا بالمعارك


المصادر:


نظريه الcontrast : لولا اللون الاسود ما كنت لتعرف الابيض لذا اقتني بداخلك بعض السواد لتبرز بياضك


"اللي ميحطنيش كحل في عينه محطوش جزمه في رجلي"


"كله بالحب".......جمله موجوده علي ظهر التكاتك
60ths فتره الستينيات يعني(الكلمتين بتوع الحرب والسلاح والمعارك والحاجات دي)

المواطن النموذجي(first generation)





شركه"البفره المحدوده" شعارنا "البفره مش محدوده.........بس (الحاجه) مش موجوده" تعلن عن يشري ساره(اول مره اشوف واحده متسميه باسم امها)........عن اعظم اختراع بعد الكهربا .....عن ابو تريكه التكنولوجيا.....فخر الصناعه الوطنيه........"المواطن المصري النموذجي الاول"(pentium 1)









مع "المواطن النموذجي" وداعا للمعارضه...وداعا للاضرابات والاعتصامات......وداعا لسكان مصر الاصليين









يتميز المواطن النموذجي بعده خواص تؤهله ليكون "هو اللي فيهم والباقي سلطه" (بعد نزوله بيقلك هيكهنو السكان الاصليين ويبيعهم خرده قي مدينه الحرفيين زي معملو مع التاكسيات كده) فهو يتميز بالاتي:









1_المواطن النموذجي الجديد مزود بخاصيه "الردود الاليه" فعلي سبيل المثال وليس الحصر




* عند ذكر احد قيادات الحزب الوطني او الحكومه فانه اليا بنطق............"رضي الله عنه وارضاه"




*وعند ذكر كلمه"التوريث"يرد قائلا........"امين"




*تحذير: رد فعله عدواني جدا عند ذكر كلمه"تغيير " امامه (بيطلع من مناخيره صوت ابيح كده مقدرش اقوله)









2_يتميز الانسان الجديد بزفاره اللسان والقباحه(راجع الميزه اللي فاتت وانت تعرف) فهو قادر علي السباب والردح ويحفظ جميع الشتائم ما جد منها وما سلف عن ظهر قلب(تحب تسمع؟) وده ع الفاضي والمليان(بيقلك الزباله اللي في شوارع القاهره لموها وحطوها في بقه)









3_المصري الجديد عريض المنكبين مفتول العضلات(حاجه كده زي رجل المستحيل......او ابراهيم الابيض) قوه 500 خناقه في اليوم...قادر علي استخدام جميع الاسلحه البيضاء(شيء لزوم الشيء)(وبأذن الله في الجيل التاني هيتم تزويده ب" ار بي جي" ميكرو كده يحطه في جيبه) وذلك اعمالا لمبدأ(العيله اللي ملهاش صايع حقها ضايع)









4_المصري الجديد قادر علي تحمل طوابير العيش والجمعيه والمصالح الحكوميه و....الخ(تؤهله بنيته القويه ولسانه الزفر لذلك) كما انه مدرب علي تحمل التلطيش و النفخ والروتين والاكتئاب والفواتيروقانون الطواريء(احسن مثال حي علي "ضبط النفس")









5_المصري الجديد اهتماماته محدوده فهو عاشق ل(التحرش الجنسي_كره القدم_تصريحات الحكومه)









6_لونه المفضل: الاخضر (شعار الحزب الوطني) ......اكلته المفضله:الكوسه(علل؟ لانها غنيه ب فيتامين "و") .....شرابه المفضل: المر(وخصوصا "المر من كيعانه")......رقمه المفضل:صفر........... ناديه المفضل:الاهلي(اصله زي الحزب الوطني بيكسب علطول)









7_يحتوي علي بعض الاختلافات الجسديه فهو مزود ب "بلف" (حتي يسهل نفخه.....س:خمن مكان البلف؟) كما انه يتميز بعرض :القفا" (وده طبعا لان القفا .....التطور الطبيعي للمواطن المصري) وطبعا يعني ليه كرش (الراجل من غير كرش زي البيت من غير فرش)يتميز ايضا بصلعته الناصعه(البقاء للأصلع)









8_انتظرو معنا باقي خواصه الغير محدوده في........ الجزء الثاني(part2)









العرض محدود حتي نفاذ الكميه اتصل ليصلك ا"المواطن النموذجي" الجديد بسعر مغري جدا999 +مصاريف الشحن








متوفر في عده مقاسات:قفا جامبو200x100




قفا وسط:100x50




قفا صغير:50x25




اتصل علي 000000000 نصلك ع الفور ومفاجأه "البفره"اتصل الان لتحصل علي "منفاخ " هديه









sponsers




(الرعاه يعني)




الحزب الوطني البيروقراطي




شركه حديد عزت

الجيران